Portail
17/01/2009
Garal Makki Sal Mantes Le Jolie.
Makkii Sal mawɗo lannda yaakaare jaɓɓaama ɗo e Mantes La Jolie to Saal biyeteeɗo
L’Agoraa.
Tawde ko goonga yimɓe keewii no feewi etee won heen ngummii ko caggal leydi Farayse, waɗii ummiiɓe Itali, Belsik, Holland e ko nanndi e ɗee leyɗeele.
Saal L’Agora o ina nawa ko ina wona 500 neɗɗo o heewii haa yimɓe ndoŋki ɗo ndarii
Sabu naatirde saal o ina yaaji no feewi kono hay toon heewii haa ɓurti, so en njiɗii tan mbiyen
Ko ari toon ko ŋakkataa 700 neɗɗo. Heewɓe ngari ko e kaaruuji ko wayi no Etampes, Orleas,
Le Habre e ko nanndi e ɗe gure.
Ina teeɗi wuro ngo Senegaalnaaɓe keewi ɗo e leydi Farayse tawi hay neɗɗo mum gooto araani. Kadi wonaa fulɓe tan ngari leƴƴi Senegaal fof ngarii, ko ɗuum waɗi ɗemɗe ɗe fof
Kaalaama ; ko ɗuum ɓuri yooɗde heen sabu Senegaal wonaa ɗemngal gootal haaletee toon,
ɗuum ina foti ɗo Senegaalnaaɓe ndennti fof ɗemɗe ɗe fof nanee ɗoon. Ɗuum gila e Rajooji ɗi
e teleeji ɗi fof ko noon foɗnoo wayde, kono laamiiɓe Senegaal jooni ɓe njiɗaa ɗuum ko ɗemngal gootal tan ɓe pawi e dow keddiiɗe ɗe fof.
So en ngartii e yeewtere nde caggal nde ardinooɓe golle ɓe ko wayi Mammadu Talla e Aliw
Gasama en e woɗɓe mbismii banndiraaɓe arnooɓe ɓe fof, ɓe nganndini yimɓe ɓe ko saabii
Garal gaay Makki Sal jooni ɓe mbiyi woni sabaabu o, ko waɗii lannda polotik o mo ari yiyde Senegaalnaaɓe mbele faamnude ɗum en no geɗe ɗe lelorii.
Caggal ɗuum ko ardiiɓe lanndaaji polotik ɗi ngadii haalde PS e laandaaji paɗɗi laamu ɗi
Fof kaalii no njiyri hannde laamu Abdullaay Wadda yimɓe fof kawrii no leydi ndi laamoraa
Hannde nih feewaani, ɗum nattii laamu potal wontii laamu ndoolndooleewu, sanytaƴiyaŋkeewu, laamu cehilaagal e bonannde jawdi leydi, laamu ngu ngannduɗaa nde welaa fof wayla kuule mum nderndere mbele ina ɓura feewnutaade tawa wonaa e laawol potal. Tawi kadi dipiteeji ɗi ngalaa koŋngol ngalaa miijo ko ko mawɗo leydi ndi yiɗi fof ko
ɗuum ɓe ngootata hay gooto suusaa luutndaande. Ko ɗuum woni laamu gudo, a ardotaako mi
aɗa diwna teŋkam, a sawndotaako mi aɗa nannda e am, a heedataa caggal-am aɗa yaɓɓa e dorllol-am.
Ko caggal ɗe jeewte Makkii Sal ƴepti goŋngol, o jaarii yimɓe ɓe fof e nootagol mum en keewal, o reftanii yimɓe ɓe ɗo rewdi e laamu Wadda haa yottii ɗo, o wiyi foɗde makko fof o
Waɗii mbele leydi ndi ina yahra yeeso, kala ɗo wonnoo jaagorgal o waɗii heen fotde makko
mbele leydi ndi ina yahra yeeso, kono ɗuum fof yonaani sabu laamu ngu wonaa ɗuum yiilotoo e jaagorɗe mum, ngu yiilotoo e ɓeen tan ko kala ko haalaa ɓe mbiya eey kala mbiyɗo
alaa riiwee.
O wiyi jooni noon o sosii lannda makko ina wiyee Yaakaare o joƴƴinoyiino kaayitaaji lannda makko kono ɓe mbiyi ɓe njaaɓaani koode ɗe o waɗi heen ɗe, kadi innde Yaakaare
nde won lannda joginooɗo ndeen ina, o wiyi ɗuum alaa caɗeele so ɓe njiɗii yoo ɓe ngittu
ɗuum, o wiyi koode ɗe ko 15 ɗe o waɗi heen ɗe, 14 ɗe ko diiwanuuji Senegaal 5 yaɓo o ko nanniyaŋkooɓe ɓe, o wiyi ngoon miijo welaaniɓe sabu hay gooto e maɓɓe meeɗaani jogaade ngoon miijo.
O wiyi jooni so hootii Senegaal ko njilloytooɗo Fuuta sabu ɓe ngoni ko e heblanaade toɗɗe
gure, o wiyi yimɓe PDS mbiyi so yahii Fuuta ne alaa ko ndanyoyta toon, ɓe mbiyi Fuuta e
Fatik fof ma ɓe keɓtu ɗum e juuɗe makko.
Caggal ɗuum o wiyi o mo yiɗi jooɗodaade e ndulumaajinaaɓe, Demɓe e Funeeɓe, sabu
Baab-mum Makki jeyaa ko Ndulumaaji Funeeɓe, mam-makko debbo jibinɗo yum-makko
o jeyaa ko Ndulumaaji Demɓe.
Nde ɓe njooɗodii e makko, o yettiiɓe no feewi ndarnde nde o tawi eɓe ndaranii mo nde,
O wiyi ko goonga o meeɗaani yahde Ndulumaaji kono o mo anndi ko jiidaa toon, ko
Kaŋko e hoore makko haali ko jidaa e gure ɗiɗi ɗe fof.
Ndulumaajinaaɓe ɓe ne mbeltiima no feewi e ko wiyi o mo yiɗi jooɗodaade e mum en ko, kanyum en njettii mo no feewi, mbiyi o siftorii ɗum en gila o mo e laamu, won ɓe o nawwi toon hajju, nde fooraase mum en boni o wallii ɗum en haa feewnaa, o mo nulda hay suukaraaji kooka, waɗni mo ɗe geɗe fof naŋgude ko toon o jeyaa.
Ndulumaajinaaɓe mbismimaa ma mo Ndulumaaji so yahii Fuuta.
Kuɗol Saydu Bah mo Ndulumaaji Demɓe.
